خانه / اشعار و مدایح / عاشق هرگز ایلمز ناز و ادا معشوقینه #مسلم_ابن_عوسجه #حضرتی_ناعمی

عاشق هرگز ایلمز ناز و ادا معشوقینه #مسلم_ابن_عوسجه #حضرتی_ناعمی

عاشق هرگز ایلمز ناز و ادا معشوقینه #مسلم_ابن_عوسجه #حضرتی_ناعمی

شجاعت و شهادت مسلم بن عوسجه (ره)
.
.
✍️ # ✍️
.
🆔: @sarmashg_channel
.
علیرضا حضرتی (ناعمی)
.
عاشق هرگز ایلمز ناز و ادا معشوقینه
بلکه قلبینده گرک اولسون وفا معشوقینه
داستان عشقیده وئرسین رضا معشوقینه
گوهر عشقی گرکدور جان و دلده بسله سین
سسلینده یارینی جان و دلیلن سسله سین
.
.
عاشقین قلبی گرک آیینه مثلی صاف اولا
رنگیدن ریب و ریادن پاک اولا شفاف اولا
جلوه ی جانانه ی جانانینه وصّاف اولا
نور دلداریله رخساری منور گؤرسنه
طلعتینده یعنی عکس روی دلبر گؤرسنه
.
.
شور و عشقه سربه سر عاشق گرک معیار اولا
دیل آچوب هر سؤز دیینده یار آدی تکرار اولا
دائماً ورد زبانی نام پاک یار اولا
آیه آیه سوره ی عشقی گرک تشریح ائده
زندگی سین ذکر حُسن یاریلن تلمیح ائده
.
.
عاشق جانان اولا هر کیم غم جان ایلمز
فکر مال و نام و ننگ و پست و عنوان ایلمز
نیتین خالص ائدر فعلینده نقصان ایلمز
ثروت و سرمایه دن اؤز دلبرین اولا بیلر
عالمی قطره حساب ایلر اونی دریا بیلر
.
.
راز عشقی بیلمز آری عشقیدن بیگانه لر
جانی آغزیندان چیخاندا مست ئولر مستانه لر
لیلی نون حُسنون گؤرر مجنون صفت دیوانه لر
سینه ی فرهادیده دائم غم شیرین اولار
باشینی تیشِیْله یارماقدا اونا شیرین اولار
.
.
مکتب کرببلاده عشقه باخ ایثاره باخ
یئتمیش ایکّی یاره باخ یئتمیش ایکی دلداره باخ
جمع هفتادو دو تنده سید و سالاره باخ
ایلیوب سینه سپر عشقیله سرشار اولدولار
زخم تیر و جرح شمشیره خریدار اولدولار
.
.
لیله ی عاشوریده امضا اولوب پیمانلاری
شرط پیمان نامه ی مذکور اولدی قانلاری
جلوه گاه حضرت جانان اولوبدی جانلاری
گئتدیلر بیگانه لر فاش اولدی رمز و راز عشق
ائتدیلر شاه شهیدانه اولار ابراز عشق
.
.
گرچه اول صحرا سراسر زمره ی اشراریدی
محنت و خوف و خطردن کربلا سرشاریدی
کوفه نون سایسیز سپاهی جانی و خونخواریدی
بی محابا لکن اول یئتمیش ایکی شوریده سر
بیربیریلن شوق وصلتدن مزاح ایلردیلر
.
.
عشق ائله مست ایلمیشدی اول وفاپرورلری
گؤزلری گؤرمزدی تیر و نیزه و خنجرلری
منصب سلم و رضاییدی فقط یاورلری
وار یئری چشم زمانه اونلارا حیران اولا
جان نه دی؟ سویلردیلر جانانه تا قربان اولا
.
.
مسلم بن عوسجه اول عاشق پاک امام
اول گئجه بیر سؤز دئدی اولدی سؤزی ختم کلام
عشقیمیز عرض ایلدی سنسن حسینجان والسلام
دوغریوب یاندیرسالار مین یول فراقه دؤزمروخ
دامنوندن آند اولا زهرایه بیز ال اوزمروخ
.
.
سندن ال اوزساق ندور طاها یانیندا عذروموز
حشریده یوخ خالق یکتا یانیندا عذروموز
روسیاه اوللوق ندور زهرا یانیندا عذروموز
عشقوه خاطر آقا دنیانی یکسر بوشلاروق
مقدمونده دوغرانوب جان وئرماقی بیز خوشلاروق
.
.
عشقوین رختین حسینجان اگنیمیزدن سویماروق
دویموشوق جاندان جهاندا سندن اما دویماروق
مین بئله لشگر اگر گلسه سنی تک قویماروق
ئولدوروب گر نعشیمیز اوسته ارازل آت چاپا
قویماروق آل رسوله کوفه اهلی ال تاپا
.
.
دشمنونله تا قولومدا وار توان جنگ ایلرم
نیزه میله عرصه نی ظالملره تنگ ایلرم
مین سواره گلسه یکسر مرکبین لنگ ایلرم
دوشسه گر شمشیر الیمدن اؤزگه همت باشلارام
داش ییغوب بو دامنه قوم جفانی داشلارام
.
.
اؤز سؤزی اوسته دایاندی الحق اول آزادمرد
روز عاشوراده ائتدی دشمنیله بیر نبرد
قورخوسوندان زاده ی سعدین اولوبدی رنگی زرد
غیرت و ایثارینه رزمنده لر احسن دئدی
ضربت شمشیرینه تیغ دوسر احسن دئدی
.
.
حمله دستوری اودم کی آلدی کوفه لشکری
باشلادی اردوی شاهه حمله ی سرتاسری
سرعتیلن قلع و قمع ائتسونله تا عاشقلری
بو ایشی اول لشکر اشرار آسان ساندیلار
اؤزلرین جنگ ائتمه میش پیروز میدان ساندیلار
.
.
صف به صف لشکر هجوم ائتدی الینده تیغ کین
مؤمنینی قانینه غلطان ائده تا مشرکین
باشلانوب جنگ و جدل گهواریه دؤندی زمین
اوینادی آتلار قوپوب تؤز عرشه چیخدی نعره لر
تیر و شمشیر و سنانه سینه لر اولدی سپر
.
.
جان نثاران حسین اما اورکده شور و شین
دل وئروب دلدارینه اولموشدی مست نشأتین
سئل قباقینده اولوبلار سد دیلینده یاحسین
بیربیریله حق یولوندا اجتماع ایلردیلر
آل طاهادن غیورانه دفاع ایلردیلر
.
.
عوسجه اوغلی ولی بیر شیر بی پروا کیمین
گؤستروردی جزر و مد طوفانلی بیر دریا کیمین
حمله سین خنثی ائدوردی دشمنین سقّا کیمین
ایلیوردی کربلا سلطانی لطف خاص اونا
سسلیوردی مرحبا دلدن آقام عباس اونا
.
.
سسلینده غیضیلن الله و اکبر عرصه ده
الحق ایلوردی بپا غوغای محشر عرصه ده
بیربیره ناگه دگوردی فتنه گرلر عرصه ده
کیم اولوردی روبه رو اول غیضیلی اصلانیلن
ایلیوردی تئز وداع هم باشیلن هم جانیلن
.
.
سسلور أن تَسألوا عَنّی فَإنّی ذو لُبَد
مسلمم مِن فَرعِ قَومٍ مِن ذُرا بَنی اسد
إعلَموا فَمَن بَغانا حائدٌ عَنِ الرَّشَد
من حسین سربازی ام ای قوم جانی قوخمارام
کوفه لی دولدورسا یکسر کربلانی قوخمارام
.
.
گلمیشم تا سیزلره معنای رزمی بیلدیرم
آدوزی پرونده ی دنیا و دیندن سیلدیرم
شیر مثلی گیرمیشم میدانه روباه ئولدورم
تیغیمون برقی ائدر بو رزمگاهی منجلی
کیمده جرأت وار قدم قویسون قباقه یاعلی
.
.
من حسینون عشقینه بو جانی قربان ایلرم
سسلرم هی یاحسین خوش ذکرین عنوان ایلرم
فخریلن بو مطلبی دنیایه اعلان ایلرم
حق پرستم من کی شاگرد کلاس حیدرم
حیدره سوگند ، آل مرتضایه نوکرم
.
.
سؤزلرین وئردی باشا شمشیرینه وئردی تکان
قدرت بازوسینی کوفی لره قیلدی عیان
مرد اودی گفتارینه ائتسون عمل ای نکته دان
هرکیم اول نام آورین میدانینه قویدی قدم
بیر الف بیر بِی چکوبدی نقشینه خط عدم
.
.
الغرض آلدی مدد لطف حق داداریدن
بیر قدر ئولدوردی اول قوم جفا کرداریدن
یوللادی قعر جحیمه زمره ی اشراریدن
کوفیان مبهوت قالدی غیرت و ایثارینه
آختاریردی راه چاره اول یلین پیکارینه
.
.
سس گلوب ای قوم آیا بیلمیسوز کیمدور بولار؟
رزمگه ده هربیری مین شیری ایله للر شکار
تن به تن هرکیم گئده جنگه یقین قانه باتار
دورد طرفدن ایلیون حمله حسین اصحابینه
یاغدیرون درد و غم و محنت دل بی تابینه
.
.
مسلمون اطرافینی آلدی او دم قوم دغا
اندیروب بیر شیره یوز شمشیری بیردن اشقیا
رد ائدوبدی چوخلارین اما دگوب بعضی اونا
دام مکر ائتدی بپا میدان آرا نامردیلر
پشت سردن ویردی اول مَرده یارا نامردیلر
.
.
قان آخوب دوشدی تواندان پیکری اولدی ضعیف
اولدی پیکانلار یارالی سینه سی اوسته ردیف
جرأت ائتدی نیزه داران اولسون اول شیره حریف
قلبیمی قان آند اولا مولایه بو سؤز ایلدی
نیزه لر اول پیکر مجروحی گؤزگؤز ایلدی
.
.
نیمه جان نقش اولدی تپراقه مطهر پیکری
قرمزی قانیله دولدی اول شهیدین گؤزلری
باشی اوسته آخرین دم درک ائدوبدی رهبری
گرچه درد غربت مولا اونا سنگینیدی
محضر جاناندا اما بذل جان شیرینیدی
.
.
گؤزلریندن قانی سیلدی مهریلن سلطان عشق
باشی اوسته باشلادی خوش لحنیلن قرآن عشق
گئت دئدی اولسون یئرون ای باوفا رضوان عشق
قرب معبوده یئتوب باشه یتیشدی نیسگیلون
فَدخُلی فی جنّتی اولسون مبارک منزلون
.
.
گؤزلرین آچدی اگرچه جان وئروردی عن قریب
گؤردی بالینینده بیر مولای مظلوم و غریب
ساقدا عباس دلاور سولدا نام آور حبیب
گوئیا صهبا دولوبدی ساغر سرشارینه
زحمتیلن بیر گولومسوندی کرملی یارینه
.
.
یولداشین گؤردی حبیب بن مظاهر جان وئرور
تیرلر نظمه دوزولموش سینه سینده سان وئرور
چشمه چشمه جوشلانور هربیر یاراسی قان وئرور
محنتوندن سویلدی هرچند من محنتده یم
هر سؤزون اولسا ولی فاش ائت منه خدمتده یم
.
.
مسلمون گلدی دوباره قلبینه بیر شور و شین
وار دئدی سنلن فقط بیرجه سوزوم ای نور عین
فاطمه اوغلی آدامسیزدی علیکَ بالحسین
قیل سفارش مندن اصحابه فقط بو مطلبی
ال حسیندن اوزمیوب شاد ایلسونلر زینبی
.
.
وای اگر زهرا عزیزین تکله سه بو کوفیان
نه مروت نه ترحمدن بولاردا وار نشان
نه آدامسیزلیق بیلوللر نه سوسوزلوق الامان
اهل عشقین اوخلارا آماج ائدللر سرورین
قانلی مقتلده حسینون دوغریاللار پیکرین
.
.
مقتله دوشسه یارالی شاه مظلومان اگر
فتنه جو شمرین الیندن هرنه فکر ائتسون گلر
تاپسا فرصت آل طاها قلبینی قان ایلیر
یوخدی انسانیّت و وجدانیدن اوندا اثر
یدّی ضربتلن حسینون باشینی دالدان کسر
.
.
گر حسین باشی کسیلسه زینبین وای حالینه
یئر گوی آغلار داغ داش آغلار حضرتین احوالینه
کوفه نون کفّاری باخماز شأنینه اجلالینه
رحم ائدن اولماز او بنت الحیدرین گؤزیاشینه
عصمت اللهین ویراللار قمچی غملی باشینه
.
.
آل هاشمله گؤرون آل امیّه نیلیر؟
زاده ی مرجانه و هند و سمیّه نیلیر
اشقیایه گور اسیر اولسا رقیه نیلیر
وقت غارت گؤزلین اولماز اورکده یاره سین
آتلی لار ناگه قولاقیندن چکر گوشواره سین
.
.
.
.
#
# #
#
#
.
✍️ # ✍️
.
🆔: @sarmashg_channel

  دوشمز همیشه ساقی بو فصل بهار اله #حسینیه #مهدیه #دلریش

شما میتوانید برای پیدا کردن محتوای مشابه به دسته بندی و برچسب های این مطلب و یا به مطالب مرتبط در زیر این مطلب مراجعه کنید مسلما اشعار دیگه ای هم هستند که شما با جستجو کردن در این سایت میتونید به صورت رایگان از آنها استفاده کنید.

اشعار و مدایح زبده الاشعار

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *