خانه / اشعار و مدایح / جناب حائری علامه سخن پرداز #کوچ_کربلا #انور_اردبیلی

جناب حائری علامه سخن پرداز #کوچ_کربلا #انور_اردبیلی

جناب حائری علامه سخن پرداز #کوچ_کربلا #انور_اردبیلی

جریان دختر حاتم طائی و گریز به مصائب حضرت زینب (س)

کوچ از کربلا

.
✍️ # ✍️
.
🆔: @sarmashg_channel
.
مرحوم انور اردبیلی
.
جناب حائری علامه سخن پرداز
یازوبدی دفترینه بو سوزی او صاحب راز
.
حجازده واریدی بر قبیله طی مشهور
صنم پرست هاموسی ساحت صمددن دور
.
لجن شرکده ایلوردیلر خود آرائی
همان قبیله نون اهلیدی حاتم طائی
.
او طایفه ایلمشدی بنای بت خانه
ثنا یریدی او بتخانه هر ثنا خوانه
.
قویولمشیدی او بتخانیه مجسمه لر
بزنمشیدی صنم گاه فرقۀ کافر
.
صدور حکم ایلدی مرتضایه رهبر دین
حبیب ذات خدا احمد خلیق و امین
.
عم اوغلی ای غزواتمده رنجلر دیده
گیدوب او طایفه نی دعوت ایله توحیده
.
سفیر دین خدا یار و یاوریم سنسن
قضاوتونده خلل یوخدی داوریم سنسن
.
اگر قبول ایلسه دینمی قبیلۀ طی
محبت ایله او قوم کبیره پی در پی
.
سوزونده منطق قرآنه استناد ایله
موحد اولماسالار چاره یوخ جهاد ایله
.
دیدی پیمبره شیر خدا گوزوم اوسته
هر امریوی قویوب اجرایه اولمارام خسته
.
ولیّ لم یزلی لشگرین ایدوب تجهیز
یتیشدی مقصده بی واهمه او کفر ستیز
.
قبیله اهلینه تکلیف ایدوبدی اسلامی
کمند دینون او مشرکلر اولمادی رامی
.
خلاصه شعله چکوب نار فتنه انگیزی
نتیجه اولدی جدال و قتال و خونریزی
.
جزاسنه یتشوبدور قبیله مردانی
قاچوب قالانلاری مسکن ایدوب بیابانی
.
او بتکده یکه واریدی خرابه قویدى على
تمام بتلری سندیردی مرتضانون الى
.
قبیله ده اولان عورت اوشاق اولوبدی اسیر
گتوردیلر اولاری سان گوروب بشیر و نذیر
.
بویوردی فوری ورون بیر نچه سرا پرده
سالون فراش بولار قالماسین قوری یرده
.
اسیروزه ایلیون رحم رختخواب ویرون
غذا ویرون آجنا کیم سوسوزدی آب ویرون
.
کیشی لری بولارون یاغی اولدی اسلامه
زنان اوشاقلاری قوش تک دوشوبدیلر دامه
.
اولیدی کاش ئلنلرده روح عبدیت
قالانلاری بیله گورمیدی خواری و خفت
.
اولان اولوبدی گرگ صبر و طاقت ایتسونلر
مواظبت ایلیون استراحت ایتسونلر
.
قضیه دن نچه گون کچدی سید مختار
گلوب دوباره اسیرانی ایلسون دیدار
.
سئوال ایدوب نجه دورحالتی پریشانلار
جواب ویردی رسول اللهه نگهبانلار
.
چادرلاریندا اسیرانی ایتمشوک راحت
غذا و سو ویریلوب ایستیوبلر هر ساعت
.
هاموسی بند اسارتده رام دور الان
ولیک بیر قیز ایدور خیمه سنده چوخ افغان
.
او قیز عزیزه دی برج سعادت اولدوزیدی
سِفانه دور آدی معروف حاتمین قیزیدی
.
او دخترین اورگنده مصیبتین کوزی وار
هم آتشین سوزی واردی هم آغلیان گوزی وار
.
حضوره ایستدی پیغمبر کرام او قیزی
ویروب تسلی و دلداری قیلدی رام او قیزی
.
او قیز رسول خدایه ایدوبدی پیشنهاد
داریخورام دیدی بوردا منی ایله آزاد
.
منیم آتامدی بلورسن قبیله سالاری
سخا و بخششنه هامونون وار اقراری
.
کریم سن بو اسیرین وار التجاسی سنه
بیزی باغشلا آقا یوز قویوب گیدک وطنه
.
بویوردی ختم نبی برج عزت اولدوزوسان
آتون سخی دی کرامتلی حاتمون قیزی سان
.
سرشکوی یوزوه توکمه منده یوخدی دوام
هامی اسیرلری من سنه باغشلیارام
.
نوایی واردی منه بو خدائی اقدامین
عطا و عفویدی فرهنگی دین اسلامین
.
ملازمینه پیمبر صدور ایدوب فرمان
سفانیه ایدون آماده یاخشی تخت روان
.
گرک گیدنده بو قیز صاحب سریر اولسون
گوزل کجاوہ سنون پرده سی حریر اولسون
.
گرکدی ایتمیه احساس غصّه بختنده
لحاف و بالشی اولسون یاتاندا تختنده
.
گیدنده حافظی اولسون نچه نفر یولدا
برهنه تیغلر اللرده ساقده صولدا
.
کرم وجود پیمبر جوشوبدی چون دریا
نچه سوری او قزا گوسفند ایدوبدی عطا
.
او قیز گورنده بو احسانی قالدى حیرتده
آتاسی حاتمی کمتر بلوب سخاوتده
.
دیدی پیمبر اسلامه حال خجلتده
گرگ سن اگلشه سن مسند نبتوده
.
دعا ایدوبدی رسول اللهی او زهره جبین
دعالرینه دیدی ختم الأنبیا آمین
.
مینوب کجاوه سینه عترتیله دوشدی یولا
او دست خالی گلن ثروتیله دوشدی یولا
.
گنه ده دفتریمی دوتدی غصه لر گردی
تداعی اولدی خیالیمده زینبون دردی
.
او حاتمون قیزیدی یتدی قوم و قارداشنا
بو خاتمون قیزیدی دگدی قمچیلر باشنا
.
نچه سوری اونا ویردی قویون رسول خدا
بونون سوروسی یتیمه یارالی خودا بالا
.
اونون کجاوه سنون اولدی پرده سی دیبا
بونون باشندا ولی قویمادیلا کهنه عبا
.
نه تیر طعنه اونا وردیلار نه دیل یاراسی
بونا شماتت اوخی دگدی آغلادی آناسی
.
سعادت اولدی اونا پیشگاه خاتمده
قیامت اولدی بونا اون بیری محرمده
.
دوشوبدی گردشی تنگه نجابت اولدوزونون
باشی آغاردی او صحراده مرتضا قزینون
.
او زینبیکه ابوالفضلدی جلو داری
باشنا قولارینا قمچی دگدی تکراری
.
مجال ویرمدیلر نهر علقمه گتسون
گیدنده کوفیه عباسه درد دل ایتسون
.
جگر قانی دولانوب اشکه دیدہ دن آخدی
قویوبدی چگننه بوینون اوزاقدان هی باخدی
.
چکلدی جار اسرانون یانوب یانان جگری
مینون دوه لره تز ترک ایدون شهید لری
.
جناب زینب کبرا دیدی دورون بالالار
یوبانمیون سیزی بو کوفیان ورار یارالار
.
آتام على کیمی ایتامه من پرستارم
سپاه سوز منه بوندان صورا علمدارم
.
سیزه نقدری جانیم وار گرک حمایت ایدم
دگنده قمچی وظیفمدی من قباقه گیدم
.
پروزی قوش کیمی گلشنده سندیرالا دورون
سیزی ده وورماسالار زینبی وورالا دورون
.
نه چاره واردی گرک کربلانی ترک ایده گون
علی اصغریمون قانین آلماقا گیده گون
.
یوزین دوتوبدی صورا فاطمه گلین لرینه
خانم تسلی ویروب قتلگهده هر بیرینه
.
رباب کیپریگوی غرق اشکناب ایلمه
یانقلی نوحه دیوب قلبمی کباب ایلمه
.
گیجه دن آغلیوسان گلمیوب یوخی گوزیوه
سنی سوسوز بالووین جانی رحم ایله اوزیوه
.
سریه آغلاما دوت نوعروسووین الینی
اوزوه مونس ایله گوشواره سیز گلینی
.
وفالی لیلی جوان اوغلووا اوزوم قربان
او آغلیان گوزیوه آغلیان گوزوم قربان
.
ملال و نسگلوین قلب ایوینده یوخدی سائی
دیز اوسته ساخلاما چوخ قوی یره بولنمش آیی
.
قاباقدا قاره گونون واردی سینه داغلارسان
وطنده باغلى اطاقین آچاندا آغلارسان
.
هاموسی اللری باشدا جفا فشاریندن
ستاره لر چکلوب آی گونون کناریندن
.
سفره عازم اولوب تیره روزگار اولالار
جهاز سیز دوه لر اوستونه سوار اولالار
.
یازیم بو غملی سوزی رقته گله دل لر
توکلدی قتلگهه خنجر الده قاتل لر
.
او باشلاریکه بدنلرده وار آیرسونلار
جدایه هر باشی بیر لاله مثلی ورسونلار
.
گوروب او منظره نی اهل بیت دلخسته
هاموسی اللرینی قویدی گوزلری اوسته
.
دوداقلاری سارالان برگ گل کیمی اسدی
اولار او چولده ملشدی بولاردا باش کسدی
.
دیین یوخیدی جوان قاسمین باشین کسنه
اون اوچ یاشندا بیر اوغلان نه ظلم ایدوبدی سنه
.
ایدوبدی نامزدی حجله نون کولون وسمه
گلین باخور تزه داماده باشنی کسمه
.
.
# #
#
#
#
.
✍️ # ✍️
.
🆔: @sarmashg_channel

  ائتمه بوچولده مکان دختر شیرین زبان

شما میتوانید برای پیدا کردن محتوای مشابه به دسته بندی و برچسب های این مطلب و یا به مطالب مرتبط در زیر این مطلب مراجعه کنید مسلما اشعار دیگه ای هم هستند که شما با جستجو کردن در این سایت میتونید به صورت رایگان از آنها استفاده کنید.

اشعار و مدایح زبده الاشعار

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *