خانه / اشعار و مدایح / علی محبتی قلبیمده تاپموش استیلا #حیدریه #تائب_تبریزی

علی محبتی قلبیمده تاپموش استیلا #حیدریه #تائب_تبریزی

علی محبتی قلبیمده تاپموش استیلا #حیدریه #تائب_تبریزی

ذکر فضایل حضرت علی (ع) – به شهادت
.
✍️ # ✍️
.
🆔: @sarmashg_channel
.
مرحوم تبریزی
.
علی محبتی قلبیمده تاپموش استیلا
ایدوبدی دایرۀ عشقده منی دارا
.
علی وصیّ پیمبردی مطلقا سوز یوخ
او نکته دن دلیم آئینه سی تاپوبدی جلا
.
علیدی نکتۀ توحیدی ایلین تفسیر
ولادتیندہ گتوردی دله کلام خدا
.
پیمبرین اوزینه نازل اولمیوب قرآن
اوخودی آیۀ قرآن او سیّد والا
.
علیدی کان فضیلت علیدی پایۀ دین
علیدی شمس امامت علیدی نور خدا
.
علیدی فتح فتوح و علیدی راحت روح
علیدی قاسم نیران و جنّت المأوا
.
علیدی شاه ولایت علیدی باب الله
علیدی عزّت امّت شفیع یوم جزا
.
اولوب او شهدی که شأنینده هل اتی نازل
امام عالم الأسرار بر عیان و خفا
.
علیدی ناطق قرآن حیّ لم یزلی
امام جن و بشردی او عروه الوثقی
.
علیدی منبع احسان علیدی کان کرم
علیدی دست خداوند فرد و بی همتا
.
جمال خالقه مرآت دور جمال علی
اودور تمام صفات حمیدیه دارا
.
علیدی فارس میدان علیدی سرور دین
علی صراط حقیقت علیدی راهنما
.
علیدی علت ایجاد سایه رحمت
علیدی نور هدا حجت حق یکتا
.
علی ولایتینه هر کس ایتمسه اقرار
جحیم روز جزاده اولور اونا مأوا
.
گر اولسا اهل ولایت مقصّر و عاصی
گینه جهنم اودوندان امید وار قوتولا
.
اولوبدی امّت الیله جهاندا چوخ مظلوم
جزا گونونده گینه أمّته او دور ملجا
.
اولوبدی عمر شریف و عزیزی آتمیش اوچ ایل
گوروب آز عمرده بیحد اذیّت و ایذا
.
یازیلسا حشره کیمی ابتلاسی قورتولماز
نه لر گلوب باشینا شرحه دلده یوخ یارا
.
پیمبر امّتینه مهربانیدی چوخ چوخ
ایدردی السیز ایاقسیز جماعتی احیا
.
مگر ایشیتمه میسن کیم تمام عمرینده
گورونمیوب ایده میل استراحته ابدا
.
گورونمیوب که اولا فوت بیر گیجه اوندان
تفحُّص فقرا و عیادت مرضی
.
گیجه زمانی گلنده او شاه دریادل
چیخاردی دیشره ایویندن ولی به طور خفا
.
یتیم و قاره لچک جمع مستحقّ لره
ویرردی دائم او شه مایه معاش و غذا
.
او صاحب کرمی کیمدی بولمدی بیرکس
دوتاردى الدن آدین ایلمزدی لیک افشا
.
جماعت آنلادی کیمدور او منبع احسان
او گون که یتدی کسوفه ستمله شمس هدا
.
گیجه کی عادتیله انتظاریدی فقرا
گوروبله وقت گیچوب گلمدی او میر هدا
.
امیدلر کسیلیب هامّوسی ایدوبله یقین
همین او سروری میش دادرس اولان اولارا
.
غرض بودور که یازام مرتضا شهادتینی
اگر کمک ایلسه حیّ فرد بی همتا
.
گیچوب وفات رسول گرامدن اوتوز ایل
ابوالائمه ایدوب ترک دهر و مافیها
.
اولوب او ایلده شب نوزدهم رمضان
بیر اوزگه عالم اولوب شهر کوفه ده پیدا
.
همان گیجه او امامین تمام انصاری
ایدردیلر هاموسی مسجد ایچره حمد و ثنا
.
ایدردیلر هره سی بیرطرفده راز و نیاز
بیری تلاوت قرآن بیری ایدردی دعا
.
او گیجه جمله سی مشغولیدی نماز شبه
تمام صبحه کیمی ساخلامیشدیلار احیا
.
جماعتیله دولیدی او مسجد کوفه
مهاجر ایتمیشدی اعتکاف جابرجا
.
اوزینی مُعتکفه ایلمیشدی قُطّامه
او آدیله اودا ایتمیشدی خیمه سین برپا
.
اونیله واریدی هم خیمه اوچ کیشی او گیجه
على قتالینه حاضر هر اوچ ولدّ زنا (۱)
.
قلنجی هر اوچی سیراب زهر ایتمیشدی
خیال قتل شه دینینه او اوچ ادنا
.
او بی حیا هر اوچون بو ایشه ایدوب وادار
او سوزده ویر یشیدی وعدۂ وصال اولارا
.
بیریسیده اولارین ظالم ابن ملجمیدی
علاقه مندیدی قطّامیه او بی پروا
.
على قتالینه بئل باغلادی بویاندا بولار
اویان طرفدن ایویندن چیخوب ولیّ خدا
.
کمال سرعتیله مسجده روان اولدی
امیر ملک عرب شیر حق جل وعلا
.
او مقتدا یتیشوب اولدی مسجده داخل
گیچوب او وقتده محرابه ملجأ الضُّعفا
.
دولاندیروب یوزینی سمت قبلیه شه دین
نماز نافلۀ صبحی باشلادی مولا
.
گوتوردی پرده نی ستار لم یزل او زمان
به حکم خالق اکبر آچیلدی باب سما
.
ملائکه اولونوب صادر امر ربانی
گورون ایدر نجه محبوبه جان حبیبی فدا
.
ابوتراب قریان حالده ترابه جبین
علی بوزینه او دمده آچیلدی باب قضا
.
او شاه بی بدلی ابن ملجم ایتدی کمین
او زهرلی قلجین أندیروب او شوم دغا
.
دیسم غلط دگی فرق پیمبره دگدی
دگنده تیغ جفا مرتضا علی باشینا
.
اوتوردی فرقینه شمشیر آخدی آلقانی
اولوبدی قانیله سرشار دیده شهلا
.
او آق محاسینی آلقانیله خضاب اولدی
کمال ضعفیله محرابه دوشدی میر هدا
.
بویادی صفحه محرابی قرمزی قانی
ترابده هامی احکام دینی یازدی اما
.
پیمبر ایتدی نوا باشین آچدی جنتده
هواده شیونیله جبرئیل ووردی ندا
.
دیدی که قانه بویاندی علی نماز اوسته
تمام کوفه نی دولدوردی بو أسفلی صلا
.
ایشیتدی کوفه نین اهلی صدای جبریلی
توکولدی دیشره هامی دلده بانگ واویلا
.
بیوک کچیک کیشی عورت جوان و پیر او دم
قویوبلا مسجده یوز داده شیون و غوغا
.
✔️ امام حسن و امام حسین در بالین پدر
.
یازالا قالمادی ایولرده بیرجه پرده نشین
ولیک چیخمادی دیشره او زینب کبرا
.
خانمدا حالی اولوب ایستدی چیخا ایودن
چیخانمادی او حیاکانی مانع اولدی حیا
.
دیار کوفه ده قرخ مین او گون قوشون واریدی
جهاده حاضریدی دین یولوندا بی پروا
.
اولاردا اولدیلا حالی همین او واقعه دن
توکولدیلر قلج اللرده دلده وااسفا
.
سپهرین آلتی دولوب صوت واعلیادن
گوروندی کوفه ده شور قیامت کبرا
.
دوتوبلا حیدرین اطرافین حیدر اولادی
گلوبله شیونه گوز یاشلی دلده واغوثا
.
دیز اوسته آلدی یارالی باشین امام حسن
توکوب سرشک بصر اول شهید زهر جفا
.
بویاندا شیون ایدردی حسین تشنه جگر
ترکردی گوز یاشی بیر یاندا تشنه لب سقّا
.
# به #
.
او زخم کینه ایاقدان علینی سالمیشدی
یوخیدی قدرتی اوز دودمانینه گیده تا
.
قویوبلا پیکرینی بیر کلیمه انصاری
کمال عزتیله احترام اولوندی اونا
.
یارالی حمل اولونوب دودمان شاهه طرف
یاخونلاشاندا بویوردی او سرور بطحا
.
قویون پیاده گیدوم دودمانیمه من اوزوم
مباد بیله گوروب زینبیم منی قورخا
.
علی یارالی بو یرده کلیمه چولقالانور
سلیلى نعشینه بیر یرده ده بوروندی عبا
.
بونون فقط باشینین بیر قلج یری واریدی
اونون وجودی سراسر یارائیدی اما
.
حسین هر ایکیسین حمل ایدنده حاضریدی
دیردی بوردا بابام وای او برده واولدا
.
گلوب اوغول باشی اوسته او شاه دریادل
گوروب جوانینی صد پاره دوغریرب اعدا
.
یارالی باشینی گوتدی آلوب دیزی اوسته
اورگی درده گلوب باندی سیدالشهدا
.
کمال رأفتیله اکبرینی دیندیردی
بیر اوزگه حاله دوشوب گوردی مظهر طاها
.
اورک باشینا باسوب مهریله جوان بالاسین
قویوب دوباره یره تاجدار کرب و بلا
.
دوشندی اکبرینین نعش پاره پاره سینه
گینه سوومادی قلب شریف شاه ولا
.
قویوب اوغول یوزینه اوز یوزین امام غریب
او آغ محاسنینی لاله تک بوبادی دما
.
اوغوشدوروب اورگین توکدی اشگ حسرتینی
بوحالتیله دیدی دور ایاقه یاتما بالا
.
على نه خوش بزیوب قان بو جسم زیبانی
یارالارون باش آچوب مثل لاله حمرا
.
ایاقه دور آپاروم خیمیه باجون گوزلر
سکینه چرخ نگراندور تیکوبدی گوز یولوا
.
سنون جوان ئولومون ای جوان قوجاتدی منی
عجب محلّده سالدی منی کمنده قضا
.
نقدر سسلدی سس گلمدی اولوب مأیوس
پوزولدی حالی اوغولدان الینى اوزدی آتا
.
خیال ایدوب که ایده نعشی حمل قتلایه
گوروب ایله داغیلوب گلمورى اله اعضا
.
او پاره پاره اولان پیکری عبایه یغوب
ووروب او دمده جوانان هاشمیه ندا
.
گلون گلون گوتورون نوجوانیمین نعشین
جوانی می گورورم روحیمه اولور ایذا
.
بو تیره توپراقا آخدیقجا اکبرین قانی
همان او قانه بوقلب ملول دور مجرا
.
بالام حیاتیمه باعث دیزیمده قوّتدور
گوزومده نوردی بو قلبیمه منیم یارا
.
بو ماه طلعتی کیم دوغریوبله بندیه بند
بر روح دور من نالانه من بدن آرا
.
✔️ حمل جنازۀ حضرت علی اکبر
.
او دم که ئولدی بالام گوئیا اوزوم ئولدوم
من ایستیم داخی بوندان صورا حیات حاشا
.
یامان اولار بیلر عالم جوان اوغول داغی
خصوص بیله جوان حسنی گل قدی رعنا
.
باجیسی شیونیله خیمه ده یولون گوزلر
گوزین تیکوبدی یولا اشکبار و زار و فگار
.
خلاصه گوتدی جوانلار على جنازه سینی
دوشندی خیمه قباقینده تا او فرش عزا
.
عبادن آچدیلار اول پاره پاره گل بدنی
توکولدی دیشره خیَمدن تمام آل عبا
.
توکردی عارضه اشگ زلال عمه لری
یولوب ساچین باجیلاری ایدردی شور و نوا
.
قیامت ایتدی او نعش اوسته آل پیغمبر
او وادی غمی دولدوردی بانگ واویلا
.
قوتار بو مطلبی # بیر اوزگه مطلبه گئچ
بیر اوزگه طرزیله حیدر غمین ایله انشا
.
✔️ ادامه شهادت حضرت علی
.
او گون که شیر حقین دگدی زخم کین باشینا
باشینی یاره لدی آخدى قانی گوز قاشینا
.
یتوردیلر ائوینه رکن دین و ایمانی
قلج یریندن آخاردی سو تک قزلقانی
.
تصور ایله نه حاله قالار مخدّره لر
او حالتیله او رکن شریعتی گوره لر
.
او شمع دینه اولوب اهل بیت پروانه
گلوبله نالیه هر تک تکی یانایانه
.
گورنده باشدان اولوب شیر لم یزل مسموم
یاخاسین ایلدی پاره یانوب خانم کلثوم
.
گورنده قان ایلیوب مرتضا یوزینی خَضَب
ال آتدى ساچلارینا شوریله خانم زینب
.
على او قوّت قلبیله تاب ایدئمزدی
نجه یارائیدی بیلمم او شه دوزنمزدی
.
یارا الیندن ایله اختیارین آلمیشدی
ایاقدان اول شه اسلامی یاره سالمیشدی
.
سزیلداشاردی یارا پیچ و تاب ایدردی علی
ایدردی ضعف اوزیندن گھی گیدردی علی
.
سالاردى یاره سینه مرهم اقرباسی اونون
ولیک شدت ایدوب دمبدم یاراسی اونون
.
قالاردی شیر خدا هر دقیقه بیر حاله
باخوب یاناردی حرم لر او غملی احواله
.
دؤزوب علی ایکی گوندوز او سوز و سازیله
بولنمورم نجه صبر ایتدی اول گدازیله
.
دولاندی اولدی شب بیست یکم رمضان
یاناردی زخمی سزیلداردی حجت یزدان
.
امامده گورونوب ارتحال احوالی
بنات طاهره نی پوزدی مرتضی حالی
.
امامدن یاخون اولدى ال اوزسون آل امام
ایدوب حرم لری مأیوس وضع حال امام
.
چالیشدیلار نقدر لیک اولمادی چاره
ایدوبدی شدت امامین باشیندا کی یاره
.
✔️ عزم حسنین بدنبال جراح
.
همین او حالده اولادی بیله بیلدی صلاح
علی طبابتینه بیر نفر گله جراح
.
چیخوبلا ایودن حسین و حسن بو فکرتیله
گیدردیلر بولی چوخ منتهای سرعتیله
.
بتول گل لری دوشموشدی بسکه تشویشه
اوز اوزلرینه او یولدا ایدردی اندیشه
.
دیردی بیربیرینه بوی درد و غم گلوری
نولوبدی گوزلره بی اختیار نَم گلوری
.
گھی دوتوب گویه یوز کشف ائدردیلر مطلب
دیردیلر کی یتیم ایلمه بیزی یارب
.
پناهیمیز آتامیزدان صورا بیزیم یوخدور
گواهسن بابامیزا علاقه میز چوخدور
.
بابامیز اولماسا گولمز داخی بیزیم یوزمیز
یقین لیلۀ مظلم اولار بو گوندوزیمیز
.
یتیم لر یوزی بو آشکار دور گولمز
بیلر یتیم بواحوالی اوزگه سی بیلمز
.
✔️ جراح در بالین حضرت علی
.
طبابت اولماقا اول راه حق مصباحی
گتوردیلر اورا نعمان آدینلی جراحی
.
او مرد پاک علی باشی اوسته تا یتدی
کمال دقتیله بیر معاینه ایتدی
.
یارالی باشدا یارایه دوشوب اونون نظری
دیدی گیدون گتورون ایمدی بیر قویون جگری
.
گتوردیلر آیروب بیر دامار او آزاده
قلج یاراسینا فوراً سالوب او اثناده
.
نه گوردی یاره ده بیلمم که گوزلری دولدی
پوزولدی حالی او دم رنگ عارضی سولدی
.
یوزینه دقّتیله شیر داورین باخدی
چکوب بیر آه یوزه اشگ حسرتی آخدی
.
دیدی بو باشدا که بیله اساس غم تورو لوب
بیله نشان ویروری زهرلی قلج وورلوب
.
اولونسا مین نفره بو یارا اگر تقسیم
او یاره ئیله ایده للر تمامی جان تسلیم
.
✔️اهل بیت در دور بستر حضرت علی
.
همین او جمله ده آندیردی یعنی پوخ چاره
علینی ئولدوره جاقدور باشینداکی یاره
.
دوتوب دوباره یوزین شاه دینه گلدی دله
یغ اهل بیتیوی باشه آقا وصیت ایله
.
بو حالتوندن آقا بیله که گلور نظره
بوگیجه آخر عمریندی چخماسان سحره
.
یقیندور اولاجاقسان حیاتدن عاری
یغ عترتون باشوا بیر دویونجاگور باری
.
دیوب بو سوزلری اشگ ترین روان ایتدی
علی ایوینی او جراح ترک ایدوب گیتدی
.
علی ایوینه هوا بارش اَلم اَله دی
یغیشدی عترتی شیر خدانی دوره لدى
.
نه نوع گور پوزولار اهل بیتین احوالی
گورنده شیرخداده او پراسف حالی
.
گوروب او حالی گوزین دولدوروب امام حسین
یتیم قالماقا آماده اولدیلار حسنین
.
پوزولدی حالی توکوب گوز یاشین خانم کلثوم
او غوشدوروب اورگین سینه دن اولوب مغموم
.
او اهل بیته اولوب کشف تا همان مطلب
یانوب اورکدن ایتیردی اوزین خانم زینب
.
دولاندی زینب زهرا مثالین احوالی
بوزینده اولدی هویدا یتیمه لیق حالی
.
غرض ولی خدا باشه یغدی عترتینی
او ضعف حالتیله باشلادی وصیتی نی
.
دولاندیروب یوزینی مجتبایه میر هدا
بویوردی قاتلیمه ویر میون فشار ابدا
.
اگرچه عاطفه دن بو شقی اوزاقدی اوغول
نه اولسادا ائویمیزده بیزه قوناقدی اوغول
.
تهیه ایتسوز او غول مندن اوتری هرنه غذا
ویرون مضایقه سیز، سیز همین غذادن اونا
.
نجات ویرسه منه حیّ قادر و ذوالمن
بوقاتلیله اوزوم ایلرم معامله من
.
منیم بر دردیمه هر گاه اولماسا چاره
گر ئولدوره منی باشیمده کی اولان یاره
.
ووروبدی چون باشیما بیر قلج بو شوم شریر
سن آل قصاصیمی ویر بو لعینه بیر شمشیر
.
تمام عترتینی صبره امر ایدوب اول شاه
ایدردی حسرتیله اهلبیت دینه نگاه
.
✔️ وصیت به امام حسین وقمربنی هاشم
.
سالوب نظر او زماندا او سرور حرمین
بیر اوزگه حالیله گوردی دوروب امام حسین
.
بیر آیری سمته باخاندا گوروب او اشجع ناس
دوروبدى اللری قوینوندا باوفا عباس
.
چاغیردی هر ایکیسین شاه دین مقابلینه
گتوردی قویدی ابوالفضل الین حسین الینه
.
بویوردی بیرجه تمنا واریمدی سیزدن اوغول
ئولونجه اوزمیون ال سیز بیری بیریزدن اوغول
.
دؤزون دوام ایدون هر درد و هر بلائیله
ضروردور سیزه انسیت ابتلائیله
.
همیشه بیربیریزه جان دیون ایشیدون جان
بیری بیریزدن اوغول آیری دوشمیون بیر آن
.
مقدّراتوزه هر نوع حق مشیتی وار
تمامی سینده قزیم زینبینده شرکتی وار
.
حمایت ایلیه سیز دینه سیز شهادتیله
سیزیله شرکت ایدر زینبیم اسارتیله
.
بو کوفه کیم منه حرمت ایده لَّه خلق عرب
اسیر اولوب گله جاقدور بورا قزیم زینب
.
بو رمزیله دیدی باشدا بلا واروزدی سیزون
که یعنی ماوقع کربلا واروزدی سیزون
.
سپرده بیربیرینه ایتدی احتضارینده
نتیجه ویردی بو سوز کربلا دیارینده
.
او گون که قالدی سوسوز خیمه لرده آل عبا
حسینه ویردی وفاسین نشان سوسوز سقّا
.
بو نکته نی قلمون ایتمه یازماقا ترغیب
على مصائبینی ایله # تعقیب
.
✔️ مشایعت حضرت زینب ازجنازه پدر
.
او گون که ایتدی بو دنیانی ترک شیر خدا
قراگیندی باتوب یاسه عترت طاها
.
علی ایویندن اوجالدی سمایه ناله و آه
قاریشدی بیر بیرینه عترت رسول الله
.
مخدّرات حرم اوزگه حالته قالدى
شه ولایتین اطرافین اهل بیت آلدى
.
گلردی نالیه شوریله زینب مظلوم
وراردی باشینه آغلاردی بینواکلثوم
.
دیردیلر بیزی بو روزگار عجب سیخدی
آلوب بابا میزی الدن ایویمیزی یخدی
.
ایدردیلر هره بیر یاندا داد و شیون و شین
توکردی گوز یاشی آغلاردی شوریله حسنین
.
بویون چیگینده دوروب حال یأسیله عباس
توکردی دیده سی رخساره سودۂ الماس
.
جناب زینب او دم اوزگه حالته قالدى
باشا ووروب آتا تابوتینی بولا سالدى
.
✔️امام حسن دربالین مریض درخرابه
.
شه ولایت ایوی داد و آهیله دولدی
جنازه سی گوتورولدی نجفده دفن اولدی
.
او دم که تاپشورولوب توپراقا شه کونین
کمال حُزنیله اوردان قیتدیلر حسنین
.
یول اوسته یتدیله ویرانه بیر بره ناگاه
نه گوردیلر که گلور صوت ناله جانکاه
.
زبس اولاردان ایله ناله اختیار آلدى
همان خرابیه فورا اولار گذر سالدى
.
نه گوردیلر که یاتوب اوردا بیرجه پیر ضعیف
زبس سیخوب مرض اندازه سیز اولوبدی نحیف
.
ولیک یوخدی یانیندا اونون مواظب اولان
ایدن دواسینی حاضر اونا مراقب اولان
.
او پیرمرد دن ایتدی سئوال امام حسن
گتور بیانه گوروم ای مریض سن کیمسن
.
بو شدت مرضیله مراقبون کیمدی
گلور عیادتوه کیم مواظبون کیمدی
.
✔️ پیرمرد مریض و امام حسین درخرابه
.
نیه بو حالتیله بوردا یاتموسان آیا
مریض سن سنه کیملر ویرور طعام و دوا
.
شکسته دل قوجا تاگوردی بیله بیر رأفت
گلوب دله بو مقالاتیله ایدوب صحبت
.
اوزوم قبیله سیزم ناخوشام غریبم من
منیم دوا ویره نیم یوخدی بی طبیبم من
.
منه مکاندی بو ویرانه یر نه مدّتدور
سزیلتی هم نفسیمدور انیس محنتدور
.
مرض سیخوب اَریوبدور بو نوعیله بدنیم
نه بیر دوا ویره نیم واردی نه گلوب گیده نیم
.
یاناردی بیر نفر آقا بو ضعف حالتیمه
گلردی لطفیله دائم منیم عیادتیمه
.
منه نوازش ایدردی کمال رأفتیله
اولاردی حالیمه جویا منیم عطوفتیله
.
اولاندا بو یره وارد او مرد پاک و سلیم
ایدردی بو در و دیوار او سروره تعظیم
.
#
.
ولیک گلمیوب او چ گوندى اول حمیده شعار
نه یوز ویروبدی اونا بیلمورم باشیندانه وار
.
حسن بویوردی او سیز امّتین امامیزدی
قتیل ایدوبله ستمله بیزیم آتامیزیدی
.
او پیر آغلادی عرض ایلدی منی گوتورون
مزاری اوستونه باری او سرورین یتورون
.
علی مزارینه تا سالدی مجتبای حلیم
دیولله ایتدی على قبری اوسته جان تسلیم
.
بویرده یاعلی یاندون او پیر حالتینه
خرابه ده بالاوین گلمدون عیادتینه
.
گوریدون اوردا سنون قزلارون نه حاله قالوب
رقیه رنگی غم و غصه دن سولوب سارالوب
.
یتیشدی بیر یره سوز سیندی خامۀ #
مداد اشگیله ایسلاندی نامۀ #
.
حسین آدین ایلیوبدور الینده دست آویز
اونا شفاعت ایدر جدی روز رستاخیز
.
ــــــــــــ
(۱) حضرت امام باقر در مجلس یزید فرمود : انبیا و امام را نمی کشد مگر ولدالزّنا
.
.
.

  گوزومده غم گتیرور موجه اشک دریاسین

#_شهادت
#_مدح
#
#
.
✍️ # ✍️
.
🆔: @sarmashg_channel

شما میتوانید برای پیدا کردن محتوای مشابه به دسته بندی و برچسب های این مطلب و یا به مطالب مرتبط در زیر این مطلب مراجعه کنید مسلما اشعار دیگه ای هم هستند که شما با جستجو کردن در این سایت میتونید به صورت رایگان از آنها استفاده کنید.

اشعار و مدایح زبده الاشعار

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *