تیتر خبرها
خانه / اشعار و مدایح / گوزوم غمونده دونوب بارش بهاره آنا

گوزوم غمونده دونوب بارش بهاره آنا

زبانحال حضرت زینب کبری سلام الله علیها در فراق مادر
.
✍️ زبده الاشعار ✍️
.

.
حاج حمید زرّین قلم
.
گوزوم غمونده دونوب بارش بهاره آنا
که آختارور گوره بلکه سنی دوباره آنا
.
دوشوبدی کشتی گوگلوم بلالی طوفانه
چکن تاپولموری گردابیدن کناره آنا
.
دیردیلر آناسیزلیق چتیندی، بُلمزدیم
دوشوبدی زینبون ایمدی همان شراره آنا
.
دولانورام، دولانان یرلرون گوروب یانورام
یوزیمی دوندریرم حیّ کردگاره آنا
.
اورک دوام ایلمور بوش گورم یرون آناجان
آخور سرشک غمیم دیده دن عذاره آنا
.
حسینیوه باخورام قلبیدن اَلولانوام
دوشنده گوزلریم اول دیده ی خماره آنا
.
ایله دولوبدی گوزل گوزلری، سولوب رنگی
سالوبدی زینبیوی درد بی شماره آنا
.
دوشوب او بلبل شوریده نطقیدن یکسر
داخی دانیشمیری منله او ماه پاره آنا
.
جهانه چوخ آناسیزلر گَلوب گیدوب، گیده جاق
ولی منیم کیمی گَلمز بو روزگاره آنا
.
جهاندا هانسی آنا دردینی دیمز قیزینا
سالوبدی روحیمه بو نسگلون شراره آنا
.
اورکده غصّه لرون ساقلیقوندا گیزلینیدی
ولیک ایمدی چخوب دردون آشکاره آنا
.
سینن ندن یارالیدی منه نیه دیمدون
ووروب بو قلبیمه چوخ یاره لر او یاره آنا
.
دیدون اوشاقدی یقین بُلمه ماخلیلقی خوشدور؟
که زینبیم ایده بُلمز بو درده چاره آنا؟
.
یاراوا مرهم ایدردیم آنا بو گوزیاشیمی
قیزون گورردون ایدر چاره زخمداره آنا
.
دوشنده یاده یخلماقلیقون کباب اولورام
ایدردون حسرتیله زینبه نظاره آنا
.
او باخماقونلا دیردون آنام باجیم زینب
آنان اُلور باجی گَل چک منی کناره آنا
.
منیم قولومدا توان اولمادی گذشت ایله
که دوشمه میشدی قیزون بیله گیر و داره آنا
.
مزارون ایتگین اگر اولماسِیدی قیرخوندا
اولاردی فرصت اقلّاً بو شرمساره آنا
.
گَلوب ایله دوشنردیم او تربت پاکه
دوشَردی شال عزا زینب اول مزاره آنا
.
حسینیوین یاپوشاردوم الیندن آهسته
او بلبلی گَتیرردیم او شاخساره آنا
.
بو نازدانه وی مین نازیله اوتورداردیم
ایدردیم آهو باخشلی گوزه نظاره آنا
.
باخشلاریندا گورِیدیم سنون باخشلاریوی
آخاردی خون دلیم دیده دن عذاره آنا
.
یانقلی دللریله بیر دویونجا اوخشاردیم
که بلبلی گَتیرردیم چمنده زاره آنا
.
هزار حیف گرک اربعینون ایوده دوتام
بیله یازوبدی یازان زینب فکاره آنا
.
یغام بالالاریوی باشیمه اوزوم اوخیم
او نوحه لر که ایدر قلبی پاره پاره آنا
.
بو ایوده آغلاماقیندا بیر آیری مشکلی وار
دوشور امام مبین درد بی شماره آنا
.
بیز آغلینده دولور گوزلری، اَلولانورام
دوشنده گوزلریم اول چشم اشکباره آنا
.
بو باره دن ولی بیر ذرّه ناگران دگلم
که زینبون چاتار آخِر او انتظاره آنا
.
بو شیعه لردن ایله آغلیانلارون گله جاق
یانار او آغلاماقا ماهیله ستاره آنا
.
یانقلی دللریله اوخشیوب سیزیلدالّار
اولار تسلّی دل قلب بی قراره آنا
.
زبان حالیمی زرّین قلم یانقلی یازار
بو شرطیلن که اوزوزدن اولار اشاره آنا
.
.
#فاطمیه_شهادت
#گوزوم_غمونده_دونوب_بارش_بهاره_آنا
#زرین_قلم
#ترکی
.
✍️ #زبدهالاشعار ✍️
.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *