خانه / اشعار و مدایح / الهی غرق گناهم منی عتاب ائله مه

الهی غرق گناهم منی عتاب ائله مه

مناجات رمضانیه

محمد علی مُصَیّبی تبریزی

الهی غرق گناهم منی عتاب ائله مه
آپار جهنمه یارب ولی جواب ائله مه

دعالریم اگر اولسا خلاف مصلحتیم
بو اعتذاری قبول ایله مستجاب ائله مه

او قدر نفسیمه ظلم ائتمیشم بو دنیاده
منی گذشت ائله عفوائت خداعذاب ائله مه

نه قدر حقّ لری قهراً ائتمیشم ناحق
اولاری یاده سالوب قلبیمی کباب ائله مه

اوروشلوق آیی گلوب ماه بخشش ورحمت
سحرزمانی منی غرق خواب ناب ائله مه

دوتوبدی خواب تغافل منی اویات یارب
بوغفلت ایله ماقی جرمیمه حساب ائله مه

یانورشرارۀ شهوتده گوزلریم شب وروز
شرار دوزخیلن گل منی عِقاب ائله مه

باخیلسا نامه اعمالیمه یریم اوتدی
ولی جهنمه سالماقدا چوخ شتاب ائله مه

او قدر توبه می سیندیرمیشام حیا ائدورم
خجالت ائتمه منی بی حیا خطاب ائله مه

منی ذلیل ائلیوبدور بو نفس شهوتران
ائویم خرابیدی یارب داهی خراب ائله مه

عطا ائله منه حال دعا و حال بُکا
یانیقلی سینه می کانون التهاب ائله مه

گوناهیمه قلم عفو چک بغیشله منی
اولاری رُقعۀ اعمالیدن حساب ائله مه

چوخ عاصیم ولی ایللر علی علی دئمیشم
شرنگ قهریویلن لوحیمی خضاب ائله مه

علی ولایتی دور سینمین مدالی خدا
ولای حیدره خاطر منی جواب ائله مه

«مُصیّب» عشقیله وورمیش بو بارگهده قلم
سوزونده اولسا خطا جرمه احتساب ائله مه

دوشوبدی درده کی درمانی ظاهراً یوخدی
دوا بو درده یتیرماقدان اجتناب ائله مه

مناجات
رمضانیه ماه_رمضان
مصیبی_تبریزی
الهی_غرق_گناهم_منی_عتاب_ائله_مه
ترکی

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *