خانه / اشعار و مدایح / زبده الاشعار / الهی الیم بوش یوزوم قاره دی

الهی الیم بوش یوزوم قاره دی

مناجات

حاج علیرضا امانی مجد اردبیلی

«الهی الیم بوش یوزوم قاره دی
بو بیچاره نین فکری آواره دی»

دریغا بو عمری تباه ائتمیشم
حضورونده یارب گناه ائتمیشم

باغیشلا ئوزون روحِ شرمنده می
توکوب آبرو، آچما پرونده می

الهی، خجالتدی آغلار گوزوم
ئوزون باخ یورولدوم ئوزومنن ئوزوم

آشوب داشدی یارب گناهیم منیم
قاباقدا واریم دادگاهیم منیم

نه فکر جهنّم ، نه جنّت دیَم
صف حشریده بیلمیرم نئینیَم؟

الهی قسم جاه و اجلالیوه
کمک سیزلره رحم ائدن حالیوه

کَرَمله ایکی عالم اول دستگیر
منی حشریده ایلمه سر به زیر

ترحّم ائدن، حیّ قهار سن
عیوبه چکن پرده، ستّارسن

اگر عبد ناپاک و نالایقم
ئوزون ایستییَن بیر آدا، عاشقم

شفاعت امیدیله زار و عنین
حسینین گلیب دوتموشام دامنین

حسینه باغیشلا بو آواره نی
کرم ایله، بیچاریه، چاره نی

کمک سیزلری قؤما درگاهیدن
یانار سینه لر شعلۀ آهیدن

کی قؤماق غمی سینه لر داغلیار
بو جریانه، زهرا ئوزی آغلیار

او گونکه سالوب حرّ ئوزون محنته
سویی باغلادی تشنه لب عترته

ائله، غیرتیندن پریشان اولوب
یانور بیلدی اصغر، پشیمان اولوب

قاتوب گؤزیاشین توبه ده آهینه
حسینین غرض، گلدی درگاهینه

ائدور عرشی آغلار حسینین آدی
علی اوغلی ئوز دشمنین قؤمادی

« امانی»اگر عبد شرمنده دی
بو درگاهه اما پناهنده دی

 مناجات
 الهی_الیم_بوش_یوزوم_قاره_دی
 امانی_اردبیلی
 ترکی

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *